一年一度父親節

無聲無息又到父親節。

每年母親節，食肆例爆，花店大旺，電視電台講完又講。可是到了父親節，一切靜如止水，連身為主角的父親們也後知後覺、不知不覺。以下是巴士上幾個男人的對話：

「喂，禮拜日好似係父親節喎。」

「係咩？乜唔係八月咩？」

「我仲以為過咗添。好似唔聽見有人提起。」

「你屋企有乜動靜？有冇人提過訂枱食飯？」

「冇喎，你估母親節咩！母親節仲要媽咪煮飯？想死？」

「可能到時有意外驚喜呢！」

「我諗唔會嘞，舊年都冇。」

「我冇乜所謂，最緊要唔好煩。而且仔大女大，啲孫都會同佢地慶祝。」

「係囉，年年都係咁，今年有乜咁特別。」

「我都冇所謂。每日放工返到屋企，見個個喺晒度，齊齊整整，就係最大嘅安慰。」

「啱，千祈唔好有麻煩嘢。」

「禮拜日跑馬喎，入唔入場？」

「入場？如果啲仔女訂咗枱食飯，咁點呀？」

「係囉，咁咪好掃興 ...... 不過，舊年都冇，今年會唔會有呢呵？」