集思錄 (0510——補遺)

** 我每次見金正日上電視，就意識到北韓真係好窮。堂堂一個國家元首，着嚟着去都係嗰套衫，成個油站加油員咁款，套衫都唔知有冇攞去洗。不過哩個可能係佢嘅苦肉計，主要話俾天真嘅美國人知：「睇我幾慘，冇衫着，快啲援助我。」

** 如果金正日嚟香港嘅半島或者文華食晚飯鋸扒，人哋都唔知俾唔俾佢入，因為佢唔着西裝又唔打呔。

** 蔡瀾教落：外出用膳，如果唔認識食肆嘅老闆或總廚，最好先行一個圈，睇吓邊樣最多人食就叫邊樣，即使最終唔啱口味，起碼因為流轉快，原材料會比較新鮮。

** 大多數人都會問餐廳經理或部長：「哩度乜嘢最好食？」廢話！自己鍾意食嘅嘢就最好食，仲要配合埋氣氛、心情。同一樣食品，今次覺得好食下次可能打折扣。

** 每次我去探 Saif 佢都請我食咖喱雞，食足半個月，我終於抗議：「你知唔知絕大多數嘅雞都係打針？即係含有雌激素，食壞人。」「咁又未必，」Saif 回應：「睇你而家幾溫柔幾好脾氣！嚟嚟嚟，今日又係咖喱雞。」

** 和尚唔一定食齋，尤其是出外化緣嘅時候，基本上人哋俾乜嘢你就要食乜嘢，食嘅往往係「葷邊素」；都算係逆來順受。

** 好多人買咗股票之後見股價跌，都會再入貨，意圖溝淡。專家話此乃下策。我絕對同意。好似我喺惠康用 $44.90 買咗一盒 40 粒家庭裝〈灣仔碼頭〉水餃，第二日百佳減價，賣 $42.90，我於是買咗一盒，溝淡佢。過咗兩日，惠康跟住減，賣 $39.90。我唔執輸，買兩盒，再溝淡。再過幾日，百佳又減，賣 $38.90。我唔順氣，再買兩盒，再溝淡，搞到成個雪櫃都係水餃。到減價戰完咗，惠康百佳都賣番正價 $44.90，我就攞一盒賣 $38.90 嘅出嚟煮，一路食一路沾沾自喜，因為我賺咗六蚊。

** 另一次溝淡嘅經驗就唔係咁愉快。我細個嘅時候久不久就有人嚟收買爛銅爛鐵、玻璃樽，唔係用錢買，係用麥芽糖加兩塊梳打餅乾交換。嗰日我見廚房兩支豉油都只剩一半，就將兩支倒埋一支，攞個空樽去換麥芽糖。到阿媽返嚟唔見咗支生抽，支老抽就滿到瀉，於是打到我飛起。

** 有次我又攞咗隻雞蛋，用蛋白溝玻璃粉自製玻璃線，同人鎅風箏。阿媽唔見咗隻雞蛋，自然入埋我數，又打。

** 我讀嘅中學有條校規，凡遲到者要在課室門口罰企，直至落堂或轉堂才可以返課室。好多人都試過罰企，我都試過，有男生有女生，喺走廊眾目睽睽，都幾瘀。

** 我將啲瘀事揚出嚟，係要話俾而家啲少年人知，有邊個未俾阿媽打過、未俾老師罰過，根本好平常，側側膊又一條好漢，使乜自殺。