阿珊與阿積

Saif 來電說女兒阿珊發燒，但仍堅持回校參加考試。「可以請假，然後補考。」我提議。「她不想，因為明天考的是英文，英文是她的強項。」Saif 說。這令我想起《哈利波特》裡的妙麗。校長宣布延期考試，哈利和榮恩開心到跳起，唯獨妙麗不高興，因為考試是妙麗的強項。

Saif 收線後不久，鬼仔朋友阿積來電道別，說要帶懷孕的太太返美國待產。「點解唔喺香港生？香港生仔平靚正。」我說。「我都係咁話，但老婆話要買保險。唉！買咗十幾份保險仲唔夠，仲要買多份 ...... 初初又話嫁雞隨雞，原來係想跟我去美國。」阿積大吐苦水。「不過都好吖，幾多人恨去美國都恨唔到。」「我鍾意香港。香港有蝦餃燒賣，仲有鴛鴦菠蘿油。喺香港三更半夜行街都唔使怕，有事打 999 警察話咁快就到。」

時間過得真快。回想前年他當眾求婚，竟說：「我來自加州你來自潮州。我叫阿積你叫積琪蓮。我地簡直天生一對。」咁都 得！婚後不久他經常晒幸福：「一家人一齊飲茶真係好！不過，香港人好怪，明明自己想飲茶但係要幫其他人斟咗先，斟到自己茶壼又冇水。仲有，七個人八件點 心，剩番一件更冇人食；冇人食，我食。」然而蜜月期一過他又抱怨：「老婆有少少麻煩。外母有多多麻煩。老婆話唔要 BB，外母話唔好，起碼要兩個。冇人徵求我意見。」

我最後問阿積：「BB 出咗世，你兩公婆搞唔搞得掂？」「掂。」阿積說：「我會同老婆分工合作。佢負責幫 BB 沖涼、餵奶、換片，其餘一切由我搞掂 ...... 不過，外母話，到時佢會飛過嚟幫手喎！」