** 北韓炮轟南韓，環球股市應聲下挫。哩個係入市嘅好時機，因為雙方背後嘅大哥唔想打，就一定打唔成。睇嚟北韓哩個爛仔只係發窮惡，想借錢。
** 其實北韓都唔使問人借，只要早一日喺各地股票市場大手沽空，發炮之後，就可以排隊收錢。
** 羅神父嘅「魔鬼論」事件似乎已告一段落。當中是否涉及誹謗我不願置評。但係我唔贊成羅神父指名道姓。既然以發水樓為題，為何只針對哩位李生？另一位李生呢？仲有郭生、鄭生、陳生、龔生 ......。如果唔開名，羅神父就可以話，凡係賣發水樓嘅都係魔鬼，冇個好人。
** 星期日小兒跟佢啲舅父去食飯，飯後打包好多餸頭餸尾，仲有糯米飯伊麵，所以星期一我放假就唔使買餸、唔使煮飯。雖然係咁，空出嚟嘅時間我依舊走入超市，推住架車，哩度睇下，嗰度睇下，不知幾悠閒，成個師奶咁。而家我先至知道點解我太太以前咁鍾意行超市。
** 我喺一間餐廳食早餐食咗幾年，最近有一段頗長時間冇去幫襯。趁 今次放假唔使買餸煮飯，我特登走去食咗個茶餐。「炸龍利柳薯條可唔可以轉薯角？」我問老闆娘。「梗係唔得啦！日頭賣薯條，夜晚先至有薯角。」老闆娘斬釘截 鐵。「我就係欣賞你有原則。嚟一份炸龍利柳薯條。」到食物上枱，我一睇，驚叫：「老闆娘，乜你咁冇原則！」
** 不論成與敗，不論喜與悲，好朋友都應該互相分享。但也有例外。倪匡說：「黃霑真係唔夠老友，生 cancer 咁大件事都唔話我知，就咁就去咗。」
** 有好多電影我地睇完之後，連戲名、劇情都唔記得，但仍然記得裡面嘅對白，例如「在火場裡面，我的官階高過任何人」、「你跳，我就跳」、「你在那裡，家也在那裡」。
沒有留言:
張貼留言