8 0 後

我的孟加拉朋友 Saif 所經營的意大利餐廳最近生意有點起色，隨即遇上另一個問題：請不到人幫手。他在新年前透過勞工處招聘，一直沒有回音。到元旦那日終於有一位 80 後的少女前來見工。根據 Saif 憶述，我組成以下的對話：

S = Saif / D = Diamond。

D：嘩，你哩度都幾難揾喎！

S：我咪喺電話教咗你點樣嚟囉。

D：你啲中文咁好，我唔使同你講英文嘞。咦，乜你哩度有蚊架，仲咁大隻添！

S：我哋哩度附近多花草樹木，可能哩兩日回暖，有隻蚊飛咗入嚟。係呢，你以前做過餐廳未？

D：未。不過我經常去餐廳食嘢。

S：喺門口成日望住你嘅男仔係邊個？

D：係我男朋友。你唔使理佢。哩度一日要返幾多粒鐘？一個月幾多錢？

S：你冇經驗，暫時做住 part-time 先，上午十點至下午三點，或者下午六點至晚上十一點，返曬兩更都得。至於人工，因為你冇經驗，暫時廿五文一個鐘，睇你表現點，再考慮轉 full-time 同加人工。

D：咁有冇貼士？同埋幾時出糧？放禮拜幾？

S：不如我俾張 form 你填咗先啦。

(Saif行去櫃面取表格的時候，瞥見Diamond正在枱底發短訊。填完表格之後......)

S：乜你有案底嘅咩？

D：梗係唔係啦！邊個話我有案底架？

S：哩度問你有冇刑事紀錄，你剔 Yes。

D：係咩？我點知呀！我見 Yes 同 No，梗係剔 Yes 啦。

S：你身份證號碼點解冇英文字母架？

D：哩個係我手機號碼 ...... 乜哩度唔係填電話號碼咩？

S：咁你可唔可以俾張身份證我睇嚇？

D：哩個好似係我私隱 ...... 你而家係咪請我先？

S：我而家就係等人用。你可唔可以即刻開工，做一日試嚇？

D：而家？梗係唔得啦，我都冇準備。而且我尋晚倒數完兼通頂，到而家仲未瞓過覺。不如咁啦，你決定咗請我嘅話，聽日再 call 我啦。

「你話嘞，」Saif 對我說：「而家啲人點揾食！」

想當年，「揾食」就是為生活掙扎。到了這一代，「揾食」就是打開雪櫃，或者「叮」一個杯麫，再不然，就落街去麥當勞。