大城小景 (外一章)

我喜歡搭巴士多過搭地鐵，不止因為巴士景觀開揚、毋須不斷跑上跑落，也因為巴士乘客比較活潑健談，更能展現人生百態。

一個老婆婆掙扎着爬上巴士上層。司機不耐煩，說：「阿婆，樓下有位。你咁樣好危險。」阿婆氣也不喘，大聲說：「個個都唔俾我上樓上。我八十歲人仲未坐過樓上，今日一定要試吓。」

一個小女孩問：「媽咪，點解哩度叫樓上？」

車到旺角，小女孩指着大厦外牆一幅一幅補習天王的大頭相，問：「媽咪，佢哋做乜嘢？」阿婆耳聰目明，搶答：「佢哋做咗壞事，俾人貼咗張相上去。」小女孩好奇追問：「媽咪，佢哋做咗壞事點解仲笑？」阿婆又搶答：「真係，做咗壞事仲笑，唔知醜。」

一 陣電話鈴聲響起，前面的西裝友接聽，說得轟耳：「放心，陳生，過兩日一定過俾你。十萬文之嘛，濕濕碎。」剛收線，電話又響。西裝友今次壓低音量，說：「我 都知拖咗你好耐，不過五千文唔係小數目，你都要俾啲時間我籌。我會盡快過俾你，放心。」跟着按掣打電話，接通後說：「大哥，唔好搞錯喎，我正話講嘅係車仔 讓半球喎。幫我落三千文。」

後面傳來一把聲音，是個年青人。他說：「今個禮拜真係唔得。今個禮拜我要返教會。外母叫咗幾次，唔去好似唔係幾好。」

坐在車頭的一對男女打鐘落車。女人眼濕濕，邊行邊說：「你呃我唔緊要，唔好話我蠢。」男人跟在後面，不知如何是好。

正要開車，阿婆跳起，大叫：「司機，有落，唔好開車住。」然後慢動作、拾級而下。

司機理直氣壯：「話咗你啦，係都要上樓上。好聲呀，唔好累我。」

阿婆不甘示弱：「人一世，物一世，點都要見識吓！」

前面的西裝友口中唸唸有詞。