名主有花

鬼仔朋友阿積突然請我飲茶，原來是報佳音。

「我結婚喇！」他顯得既興奮又無奈。

「恭喜你！新娘係咪上次一齊『打冷』嘅潮州女仔 Amy？」

「潮州女仔有乜問題？你哋個個都對潮州人有偏見。」

「點會呢，我老婆都係潮州人。潮州女仔好吖，知慳識儉，又捱得。你見過未來外母未？」

「見過，好好人，仲好為我著想。我話我冇乜錢，佢話唔一定要擺酒，俾禮金都得。你有經驗，你話應該俾幾多？」

「嚇 ......」我陷入回憶之中。

「仲有呀，佢話潮州人嫁女唔興派餅，要派糖。咁仲好，我估一盒金莎無論如何都平過一盒中式嫁女餅，或者同西餅差唔多價錢。」

「你問清楚未？」

「梗係問清楚啦，你知我 IQ 幾高。Amy 仲教我去和記隆打探下。」

「潮州人嫁女派嘅『糖』即係潮州嫁女餅。當年我都係幫襯和記隆。」

「係咩？幾多錢一盒？」

「當年我問完價之後，即時喺和記隆暈低。仲有，唔講你唔知，潮州人好多親戚。」

「嚇！咁即係 ......」阿積低頭沉思。

「你哋結婚之後打算住邊度？」

「Amy 話最好住近外家，即係深水埗。我唔鍾意。佢屋企樓下係地鐵站、巴士站，仲有投注站，大排檔開到鬼咁夜，嘈到死。佢話咁至方便。」

「係呀，正因為方便先至值錢。香港人就係咁特別。」

「我決定搬去長洲。我啲朋友都住喺長洲。」

「Amy 同佢父母有乜意見？」

「佢爹哋話我老實。佢媽咪話我蠢。佢就話嫁雞隨雞喎。我話必要時返美國結婚，乾手淨腳唔使煩。睇嚟佢媽咪都開始有啲軟化。」

「好！橫掂都係，不如食住上，講埋禮金同派糖嗰筆。」

「不如你同我一齊去講。你係我最好嘅中國人老友，又有哩方面嘅經驗。」

「嚇 ......」看來真正懂得食住上的是阿積。「話時話，你覺得你未來外母點？」

「佢點同我有乜關係？我娶佢個女，又唔係娶佢。」

「你有所不知。女最受阿媽影響。二十年後，Amy 嘅性格同體形點都同佢媽咪而家有啲相似。」

「Really？Oh ...... no！」